Telangana Unified Welfare Card : అన్ని సంక్షేమ పథకాలకు ఒకే కార్డు పూర్తి వివరాలు

Telangana Unified Welfare Card: తెలంగాణలో సంక్షేమ పథకాల అమలులో భారీ మార్పులకు ప్రభుత్వం సిద్ధమవుతోంది. రాష్ట్ర ప్రజలందరికీ ఒకే “యూనిఫైడ్ వెల్ఫేర్ కార్డ్” అందించే దిశగా సీఎం రేవంత్ రెడ్డి కీలక నిర్ణయం తీసుకున్నారు.

హైదరాబాద్‌లో ఐటీ మంత్రి శ్రీధర్ బాబు మరియు ఉన్నతాధికారులతో నిర్వహించిన సమీక్ష సమావేశంలో సీఎం ఈ మేరకు అధికారులకు ఆదేశాలు జారీ చేశారు.

Telangana Unified Welfare Card ఒకే కార్డులో అన్ని పథకాల వివరాలు

ప్రస్తుతం వివిధ శాఖలు వేర్వేరు పథకాల కోసం వేర్వేరు కార్డులు జారీ చేస్తున్నాయి. అయితే ఇకపై ఒకే యూనిఫైడ్ కార్డులో అన్ని సంక్షేమ పథకాల ప్రయోజనాల వివరాలు ఉండేలా ప్రభుత్వం ప్రణాళిక రూపొందిస్తోంది.

ఈ కార్డు ద్వారా ఒక వ్యక్తి ఏఏ ప్రభుత్వ పథకాల లబ్ధి పొందుతున్నాడో పూర్తి వివరాలు అందుబాటులో ఉంటాయని అధికారులు తెలిపారు.

ఆధార్ తరహాలో స్టేట్ ఐడీ

ఆధార్ నంబర్ మాదిరిగా తెలంగాణ స్థాయిలో ప్రత్యేక యూనిక్ ఐడీ నంబర్ ప్రవేశపెట్టే అవకాశాలను కూడా పరిశీలించాలని సీఎం సూచించారు.

ఈ విధానం ద్వారా ప్రతి పౌరుడి సంక్షేమ ప్రొఫైల్‌ను ఒకే చోట చూడగలిగే అవకాశం ఉంటుందని ప్రభుత్వం భావిస్తోంది.

AI టెక్నాలజీతో పారదర్శకత

లబ్ధిదారుల డేటాను ఆర్టిఫిషియల్ ఇంటెలిజెన్స్ (AI) ఆధారంగా విశ్లేషిస్తే పథకాల అమలులో పారదర్శకత పెరుగుతుందని సీఎం పేర్కొన్నారు.

అర్హులైన వారికి మరింత ఖచ్చితంగా పథకాలు అందించడంతో పాటు, అనర్హులను గుర్తించడం కూడా సులభమవుతుందని చెప్పారు.

మరణ ధృవీకరణతో పెన్షన్ డేటా లింక్

ఒక వ్యక్తి మరణ ధృవీకరణ పత్రం జారీ అయిన వెంటనే ఆ సమాచారం సోషల్ సెక్యూరిటీ పెన్షన్ డేటాబేస్‌కు చేరే విధంగా వ్యవస్థ రూపొందించాలని సీఎం సూచించారు.

దీంతో అనవసరంగా పెన్షన్ కొనసాగకుండా చర్యలు తీసుకోవచ్చని ప్రభుత్వం భావిస్తోంది.

ఆరోగ్య వివరాలు కూడా లింక్

ప్రజల హెల్త్ ప్రొఫైల్‌ను కూడా ఈ యూనిఫైడ్ కార్డుతో అనుసంధానం చేయాలని సీఎం అధికారులకు సూచించారు. ఇది భవిష్యత్తులో ప్రభుత్వ ఆరోగ్య సేవల అమలులో కీలకంగా మారే అవకాశం ఉందని భావిస్తున్నారు.

గల్ఫ్ ఉద్యోగుల డేటాపై ప్రత్యేక దృష్టి

విదేశాలకు ముఖ్యంగా గల్ఫ్ దేశాలకు ఉద్యోగాల కోసం వెళ్లే కార్మికుల వివరాలను కూడా ప్రత్యేకంగా నమోదు చేయాలని సీఎం ఆదేశించారు. పాస్‌పోర్ట్, వీసా, స్కిలింగ్, ట్రైనింగ్ వంటి వివరాలను ఒకే వ్యవస్థలో ఉంచడం ద్వారా మధ్యవర్తులు, అక్రమ ఏజెంట్ల ప్రభావాన్ని తగ్గించవచ్చని ప్రభుత్వం భావిస్తోంది. తెలంగాణ ప్రభుత్వం తీసుకొస్తున్న ఈ యూనిఫైడ్ వెల్ఫేర్ కార్డ్ వ్యవస్థ అమలైతే సంక్షేమ పథకాల నిర్వహణలో పెద్ద మార్పులు చోటుచేసుకునే అవకాశం కనిపిస్తోంది.