TGSRTC యూనియన్ ఎన్నికలు.. త్వరలో తేదీ ప్రకటన

TGSRTC Trade Union Elections: తెలంగాణ ఆర్టీసీ (TGSRTC)లో ట్రేడ్ యూనియన్ ఎన్నికల తేదీని త్వరలో ప్రకటిస్తామని రవాణా మంత్రి పొన్నం ప్రభాకర్ తెలిపారు. అసెంబ్లీలో ప్రశ్నోత్తరాల సమయంలో పలువురు ఎమ్మెల్యేలు అడిగిన ప్రశ్నలకు మంత్రి సమాధానం ఇచ్చారు.

తెలంగాణ ప్రజలకు RTC ఎంతో ముఖ్యమైన సేవ అందిస్తోందని మంత్రి చెప్పారు. రాష్ట్రంలో RTC బస్సులు ప్రతిరోజూ సుమారు 30 లక్షల కిలోమీటర్లు ప్రయాణిస్తూ దాదాపు 65 లక్షల మంది ప్రయాణికులను గమ్యస్థానాలకు చేరుస్తున్నాయని తెలిపారు.

త్వరలో RTC యూనియన్ ఎన్నికలు

RTCలో కార్మిక సంఘాల ఎన్నికల ప్రక్రియ ప్రస్తుతం కొనసాగుతోందని పొన్నం ప్రభాకర్ చెప్పారు.

Also Read 12 ఏళ్ల తర్వాత మళ్లీ వికసించిన నీలకురింజి.. ఊదా రంగులోకి కొండలు

ఎన్నికలు పూర్తయిన తర్వాత గెలిచిన యూనియన్ ప్రతినిధులను అధికారిక కమిటీలో చేర్చి విలీన ప్రక్రియను ముందుకు తీసుకెళ్తామని తెలిపారు.

ఇతర రాష్ట్రాల్లో RTC విలీనం సమయంలో ఎదురైన సమస్యలు తెలంగాణలో రాకుండా జాగ్రత్తలు తీసుకుంటున్నామని మంత్రి చెప్పారు.

మహాలక్ష్మి పథకంతో RTCకి ప్రయోజనం

కాంగ్రెస్ ప్రభుత్వం 2023 డిసెంబర్ 7న అధికారంలోకి వచ్చిన తర్వాత డిసెంబర్ 9న మహాలక్ష్మి పథకాన్ని ప్రారంభించిందని మంత్రి గుర్తుచేశారు.

ఈ పథకం ద్వారా మహిళలకు RTC బస్సుల్లో ఉచిత ప్రయాణ సౌకర్యం కల్పించారు. దీని వల్ల మహిళలపై ఆర్థిక భారం తగ్గడంతో పాటు RTCకి కూడా ప్రయోజనం కలిగిందని మంత్రి తెలిపారు.

మహాలక్ష్మి పథకం ప్రారంభమైన తర్వాత బస్సుల్లో ప్రయాణికుల సంఖ్య, బస్ స్టేషన్లలో రద్దీ గణనీయంగా పెరిగిందని చెప్పారు.

మంత్రి వెల్లడించిన వివరాల ప్రకారం ఇప్పటివరకు 347.47 కోట్ల మహిళా ప్రయాణాలు ఉచితంగా జరిగాయి. దీని ద్వారా మహిళలు మొత్తం రూ.12,171 కోట్లు ఆదా చేశారని తెలిపారు.

హైదరాబాద్‌కు 2,200 ఎలక్ట్రిక్ బస్సులు

హైదరాబాద్ నగరంలో PM E-Drive పథకం కింద 2,200 ఎలక్ట్రిక్ బస్సులను ప్రవేశపెట్టేందుకు ప్రభుత్వం ప్రణాళికలు సిద్ధం చేస్తోందని మంత్రి తెలిపారు.

ప్రీమియం కేటగిరీ బస్సులు, RTCకి చెందిన ఎలక్ట్రిక్ బస్సుల్లో ఇప్పటికే CCTV కెమెరాలు ఏర్పాటు చేసినట్లు చెప్పారు.

RTC భూములు ప్రైవేటుకు ఇవ్వం

యాదాద్రి ఆలయానికి వెళ్లే భక్తుల కోసం వంగర వద్ద ఎక్స్‌ప్రెస్ బస్సులు ఆపేలా చర్యలు తీసుకుంటామని మంత్రి హామీ ఇచ్చారు.

అదే సమయంలో RTC భూములను ప్రైవేట్ వ్యక్తులకు అప్పగించే ఉద్దేశం ప్రభుత్వానికి లేదని స్పష్టం చేశారు. RTC ఆస్తులను కాపాడి సంస్థ అభివృద్ధికి ఉపయోగిస్తామని మంత్రి పొన్నం ప్రభాకర్ తెలిపారు.