Ketan Agarwal Case దర్యాప్తులో కొత్త విషయాలు వెలుగులోకి వస్తున్నాయి. ప్రధాన నిందితులు సియా గోయల్, చేతన్ చౌదరి మధ్య ఉన్న సంబంధం క్రికెట్ పరిచయం ద్వారా ప్రారంభమైనట్లు పోలీసులు గుర్తించారు. ఈ పరిచయం క్రమంగా ప్రేమగా మారి, చివరకు కుట్రకు దారితీసిందని దర్యాప్తు అధికారులు అనుమానిస్తున్నారు.
క్రికెట్ ద్వారా పరిచయం.. తర్వాత ప్రేమ
పోలీసుల సమాచారం ప్రకారం చేతన్ చౌదరి స్థానిక క్రికెట్ మ్యాచ్ల్లో సియా గోయల్ సోదరుడు సాహిల్ గోయల్తో కలిసి ఆడేవాడు. ఆ మ్యాచ్లకు సియా కూడా తరచూ హాజరవుతుండడంతో ఇద్దరికీ పరిచయం ఏర్పడింది. అనంతరం 2025 దీపావళి సందర్భంగా ఓ స్నేహితుడు ఏర్పాటు చేసిన కార్యక్రమంలో మళ్లీ కలుసుకున్న తర్వాత వారి మధ్య సన్నిహిత సంబంధం పెరిగినట్లు దర్యాప్తులో తేలింది.
2,004 కాల్స్.. 238 గంటల సంభాషణ
దర్యాప్తులో భాగంగా సేకరించిన కాల్ రికార్డుల ప్రకారం ఈ ఏడాది జనవరి నుంచి ఇద్దరి మధ్య 2,004 ఫోన్ కాల్స్ జరిగినట్లు పోలీసులు గుర్తించారు. ఈ కాల్స్ మొత్తం 238 గంటల పాటు కొనసాగినట్లు వెల్లడించారు. ఈ కమ్యూనికేషన్ కేసు దర్యాప్తులో కీలక ఆధారంగా మారిందని అధికారులు చెబుతున్నారు.
డిలీట్ చేసిన వాట్సాప్ చాట్స్పై ఫోరెన్సిక్ దృష్టి
Ketan Agarwal Caseలో డిజిటల్ ఆధారాలు కూడా కీలకంగా మారాయి. సియా గోయల్, చేతన్ చౌదరి తమ మొబైల్ ఫోన్లలోని వాట్సాప్ చాట్స్, ఇన్స్టాగ్రామ్ సందేశాలు, ఇతర డేటాను తొలగించినట్లు పోలీసులు గుర్తించారు. రీసైకిల్ బిన్ నుంచి కూడా డేటా తొలగించినట్లు తెలుస్తోంది. ప్రస్తుతం ఫోరెన్సిక్ నిపుణులు ఆ డేటాను తిరిగి రికవరీ చేసే పనిలో ఉన్నారు.
పెళ్లికి ముందు ఏం జరిగింది?
దర్యాప్తు ప్రకారం సియా కుటుంబ సభ్యులు ఆమె వివాహాన్ని రియల్ ఎస్టేట్ వ్యాపారి కేతన్ అగర్వాల్తో నవంబర్లో ఉదయ్పూర్లో నిర్వహించేందుకు ఏర్పాట్లు చేశారు. అయితే సియా, చేతన్ కలిసి పారిపోవాలని మొదట భావించినప్పటికీ కుటుంబ పరువు దెబ్బతింటుందనే కారణంతో ఆ ఆలోచనను విరమించుకున్నట్లు పోలీసులు చెబుతున్నారు. అనంతరం నిశ్చితార్థాన్ని రద్దు చేసుకునే మార్గాలపై చర్చించి చివరకు కుట్ర పన్నినట్లు ఆరోపిస్తున్నారు.
లోహగడ్ కోట వద్ద ఘటన
జూన్ 18న పుణే సమీపంలోని లోహగడ్ కోట వద్ద ఈ ఘటన జరిగినట్లు పోలీసులు చెబుతున్నారు. ఘటనకు ముందు ఇద్దరూ పుణెలోని ఒక కేఫేలో కలుసుకున్నట్లు సీసీటీవీ దృశ్యాలు ఉన్నాయని దర్యాప్తు అధికారులు వెల్లడించారు. అనంతరం సియా కేతన్ను ట్రెక్కింగ్కు తీసుకెళ్లగా, చేతన్ వేరే మార్గంలో అక్కడికి చేరుకున్నట్లు అనుమానిస్తున్నారు. కేతన్ను లోయలోకి నెట్టివేసి ప్రమాదవశాత్తు పడిపోయినట్లు చూపించేందుకు ప్రయత్నించారని పోలీసులు ఆరోపిస్తున్నారు.
ఒకరిపై ఒకరు ఆరోపణలు
విచారణ సమయంలో ఇద్దరు నిందితులు ఒకరిపై ఒకరు ఆరోపణలు చేసుకుంటున్నట్లు సమాచారం. ఆలోచన సియాదేనని చేతన్ చెబుతుండగా, మొత్తం ప్రణాళిక చేతనే రూపొందించాడని సియా వాదిస్తున్నట్లు పోలీసులు తెలిపారు. ఈ విభిన్న వాంగ్మూలాల వెనుక అసలు నిజాన్ని వెలికితీసేందుకు దర్యాప్తు కొనసాగుతోంది.
ప్రతిరోజూ తాజా వార్తలు మీ వాట్సాప్కు నేరుగా అందుకోండి — Telanganapatrika WhatsApp Channel ని ఇప్పుడే Follow చేయండి. తాజా వార్తల కోసం మా Google News పేజీని కూడా Follow చేయండి.
