GHMC Badangpet: గ్రేటర్ హైదరాబాద్ మున్సిపల్ కార్పొరేషన్ (GHMC) పరిధిలోకి బడంగ్పేట్ మున్సిపాలిటీ అధికారికంగా విలీనం కావడంతో అక్కడి ప్రజల్లో కొత్త ఆశలు చిగురించాయి. విస్తీర్ణ పరంగా ఇది GHMCలో విలీనమైన 27 పట్టణ స్థానిక సంస్థల్లో అతిపెద్దది కావడం విశేషం.
ఈ విలీనంతో బడంగ్పేట్ ప్రాంతంలో మౌలిక వసతులు మెరుగుపడతాయని, రోడ్లు, డ్రైనేజీ, నీటి సరఫరా వంటి సమస్యలకు పరిష్కారం లభిస్తుందని స్థానికులు భావిస్తున్నారు. ఇప్పటివరకు జీ+2 అంతస్తుల వరకే భవన అనుమతులు ఉండగా, GHMCలో కలవడంతో హై-రైజ్ భవనాల అవకాశాలు పెరుగుతాయని రియల్ ఎస్టేట్ వర్గాలు ఆశాభావం వ్యక్తం చేస్తున్నాయి.
బడంగ్పేట్ పరిధిలోని అల్మాస్గూడ, నాదర్గుల్, కుర్మల్గూడ, గుర్రంగూడ, బాలాపూర్ (భాగం), వెంకటాపూర్, మామిడిపల్లి వంటి ప్రాంతాల్లో దాదాపు 200 కాలనీలకు సరైన రోడ్లు లేవు. వీటిలో 90 శాతం కాలనీల్లో అధికారిక రహదారులే లేవని స్థానికులు చెబుతున్నారు. GHMC విలీనంతో ఈ సమస్యలు పరిష్కారమవుతాయని వారు ఆశిస్తున్నారు.
అయితే మరోవైపు ఆస్తి పన్నులు, నీటి చార్జీలు పెరుగుతాయేమో అన్న భయం కూడా ప్రజల్లో ఉంది. ఇప్పటివరకు మున్సిపాలిటీగా ఉన్నప్పుడు తక్కువగా ఉన్న పన్నులు, GHMC పరిధిలోకి రావడంతో భారమవుతాయనే ఆందోళన వ్యక్తమవుతోంది.
ఇక బడంగ్పేట్కు గుర్తుగా ఉన్న చారిత్రక ‘బడంగ్పేట్ బుర్జు’ చిహ్నం కూడా విలీనంతో కనుమరుగయ్యే అవకాశం ఉందన్న చర్చ సాగుతోంది. మున్సిపల్ కార్పొరేషన్ బోర్డులపై ఇప్పటివరకు ఉన్న బుర్జు చిహ్నాన్ని GHMC చిహ్నంతో మార్చడం ఇప్పటికే మొదలైంది.
మొత్తానికి, GHMCలో బడంగ్పేట్ విలీనం అభివృద్ధికి కొత్త దారులు తెరవొచ్చు, కానీ అదే సమయంలో ప్రజలపై ఆర్థిక భారం పడకుండా ప్రభుత్వం స్పష్టమైన చర్యలు తీసుకోవాలని స్థానికులు కోరుతున్నారు.
Read More: Read Today’s E-paper News in Telugu
