BRS MLA disqualification: తెలంగాణ రాజకీయాల్లో కీలక పరిణామం చోటుచేసుకుంది. బీఆర్ఎస్కు చెందిన ఐదుగురు ఎమ్మెల్యేలపై దాఖలైన అనర్హత పిటిషన్లను అసెంబ్లీ స్పీకర్ గడ్డం ప్రసాద్ కుమార్ తిరస్కరించారు. పార్టీ ఫిరాయింపులకు సంబంధించిన స్పష్టమైన ఆధారాలు లేవని స్పీకర్ తన తీర్పులో పేర్కొన్నారు.
2023 అసెంబ్లీ ఎన్నికల్లో బీఆర్ఎస్ టికెట్పై గెలిచిన 10 మంది ఎమ్మెల్యేలు 2024లో కాంగ్రెస్కు దగ్గరయ్యారని ఆరోపిస్తూ బీఆర్ఎస్ ఈ పిటిషన్లు దాఖలు చేసింది. అయితే వీరిలో ఐదుగురు ఎమ్మెల్యేలు ఇప్పటికీ బీఆర్ఎస్లోనే ఉన్నారని, అధికారికంగా కాంగ్రెస్లో చేరినట్లు ఎలాంటి సాక్ష్యాలు లేవని స్పీకర్ స్పష్టం చేశారు.
అనర్హత వర్తించని ఎమ్మెల్యేలు తెల్లం వెంకటరావు, బండ్ల కృష్ణమోహన్ రెడ్డి, టీ. ప్రకాశ్ గౌడ్, గూడెం మహిపాల్ రెడ్డి, ఆరెకపూడి గాంధీగా స్పీకర్ పేర్కొన్నారు. వీరు ముఖ్యమంత్రి రేవంత్ రెడ్డిని కలిసింది కేవలం తమ నియోజకవర్గాల అభివృద్ధి నిధుల కోసమేనని చెప్పారని స్పీకర్ గుర్తు చేశారు.
BRS MLA disqualification ఆధారాలు లేవంటూ తిరస్కరణ
ఇదే సమయంలో మిగతా ఎమ్మెల్యేలపై విచారణ కొనసాగుతుందని తెలిపారు. కొందరు ఎమ్మెల్యేలు ఇంకా నోటీసులకు సమాధానం ఇవ్వాల్సి ఉందని, వారి విషయంలో తుది నిర్ణయం తరువాత తీసుకుంటామని స్పీకర్ వెల్లడించారు.
ఈ వ్యవహారంలో ఇప్పటికే సుప్రీంకోర్టు కూడా జోక్యం చేసుకుంది. అనర్హత పిటిషన్లపై నిర్ణయం తీసుకోవాలని స్పీకర్ను కోర్టు ఆదేశించగా, ఆలస్యం కారణంగా నోటీసులు కూడా జారీ అయ్యాయి.
స్పీకర్ తాజా నిర్ణయంతో తెలంగాణ రాజకీయాల్లో మరోసారి వేడి పెరిగింది. కాంగ్రెస్, బీఆర్ఎస్ మధ్య జరుగుతున్న రాజకీయ పోరు రానున్న రోజుల్లో మరింత ఉత్కంఠకు దారితీసే అవకాశముందని రాజకీయ విశ్లేషకులు అభిప్రాయపడుతున్నారు.
Read More: Read Today’s E-paper News in Telugu
