GHMC Split into 3 Corporations : హైదరాబాద్లో GHMCను మూడు మున్సిపల్ కార్పొరేషన్లుగా విభజించిన రాష్ట్ర ప్రభుత్వం. సైబరాబాద్, మల్కాజిగిరి కార్పొరేషన్లు ఏర్పాటు. జయేష్ రంజన్ స్పెషల్ ఆఫీసర్గా నియామకం.
హైదరాబాద్ నగర పాలనలో కీలక మార్పులు చోటుచేసుకున్నాయి. దేశంలోనే అతిపెద్ద పౌర సంస్థగా గుర్తింపు పొందిన గ్రేటర్ హైదరాబాద్ మున్సిపల్ కార్పొరేషన్ (GHMC)ను రాష్ట్ర ప్రభుత్వం మూడు వేర్వేరు కార్పొరేషన్లుగా విభజించింది. బుధవారం నుంచి ఈ పునర్వ్యవస్థీకరణ అమల్లోకి వచ్చింది.
ఇకపై హైదరాబాద్ ప్రాంతం మూడు కార్పొరేషన్లుగా పనిచేయనుంది:
- GHMC
- సైబరాబాద్ మున్సిపల్ కార్పొరేషన్ (CMC)
- మల్కాజిగిరి మున్సిపల్ కార్పొరేషన్ (MMC)
ప్రతి కార్పొరేషన్కు ప్రత్యేక కమిషనర్లు బాధ్యతలు స్వీకరించారు. ప్రస్తుత GHMC కమిషనర్ ఆర్.వి. కర్ణన్ తన పదవిలోనే కొనసాగనున్నారు. అదనపు కమిషనర్లు జి. శ్రీజనను సైబరాబాద్ కమిషనర్గా, టి. వినయ్ కృష్ణా రెడ్డిను మల్కాజిగిరి కమిషనర్గా నియమించారు.
అదేవిధంగా, మెట్రోపాలిటన్ ఏరియా అండ్ అర్బన్ డెవలప్మెంట్ స్పెషల్ చీఫ్ సెక్రటరీ జయేష్ రంజన్ను మూడు కార్పొరేషన్లకు స్పెషల్ ఆఫీసర్గా నియమిస్తూ ప్రభుత్వం ఉత్తర్వులు జారీ చేసింది.
GHMC Split into 3 Corporations వార్డులు మరియు జోన్ల వివరాలు
GHMC పరిధిలో 150 వార్డులు, 30 సర్కిళ్లు ఉంటాయి. షంషాబాద్, రాజేంద్రనగర్, చార్మినార్, గోల్కొండ, ఖైరతాబాద్, సికింద్రాబాద్ జోన్లు ఇందులోకి వస్తాయి.
సైబరాబాద్ మున్సిపల్ కార్పొరేషన్లో 76 వార్డులు, 16 సర్కిళ్లు ఉంటాయి. ఇందులో:
- సిరిలింగంపల్లి
- కూకట్పల్లి
- కుత్బుల్లాపూర్ జోన్లు
మల్కాజిగిరి మున్సిపల్ కార్పొరేషన్లో 74 వార్డులు, 14 సర్కిళ్లు ఉంటాయి. ఇందులో:
- ఎల్బీ నగర్
- మల్కాజిగిరి
- ఉప్పల్ జోన్లు
పునర్వ్యవస్థీకరణ లక్ష్యం ఏమిటి?
ప్రభుత్వం ప్రకారం, ఈ విభజన ద్వారా:
వికేంద్రీకరణ బలపడుతుంది. ఫీల్డ్ స్థాయిలో పరిపాలన మెరుగుపడుతుంది. పౌరులకు వేగవంతమైన సేవలు అందుతాయి. భవిష్యత్ నగర అభివృద్ధికి స్పష్టమైన ప్రణాళిక అమలు చేయవచ్చు
గత డిసెంబర్లో హైదరాబాద్ పరిసర ప్రాంతాల 27 మున్సిపాలిటీలను GHMCలో విలీనం చేయడంతో నగర విస్తీర్ణం 2,053 చదరపు కిలోమీటర్లకు పెరిగింది. ఈ నిర్ణయంపై అప్పట్లో BRS, BJP, AIMIM సహా పలు పార్టీల నుంచి తీవ్ర విమర్శలు వచ్చాయి.
Read More: Read Today’s E-paper News in Telugu
