TG TMARS Telangana: తెలంగాణ ప్రభుత్వం ట్రాఫిక్ నిర్వహణ, రోడ్డు ప్రమాదాల నియంత్రణ, హైవే పెట్రోలింగ్, రోడ్డు-రైలు భద్రత కోసం కొత్త ప్రత్యేక పోలీస్ విభాగాన్ని ఏర్పాటు చేసింది. తెలంగాణ ట్రాఫిక్ మేనేజ్‌మెంట్, రోడ్ అండ్ రైల్ సేఫ్టీ బ్యూరో (TG-TMARS) పేరుతో ఈ వ్యవస్థను తీసుకొచ్చింది.
ఈ మేరకు ప్రభుత్వం G.O.Ms.No.135 జారీ చేసింది. రాష్ట్రవ్యాప్తంగా ట్రాఫిక్ నిర్వహణ, అమలు చర్యలు, ప్రమాదాల దర్యాప్తు తదితర అంశాలను ఒకే వ్యవస్థ కిందకు తీసుకురావడం దీని ప్రధాన ఉద్దేశం.
TG TMARS ఏం చేస్తుంది?
హైదరాబాద్ కేంద్రంగా TG-TMARS పనిచేయనుంది. తెలంగాణ మొత్తం దీని పరిధిలో ఉంటుంది.
ఈ బ్యూరోకు ADGP లేదా IGP స్థాయి అధికారి డైరెక్టర్‌గా వ్యవహరిస్తారు. పరిపాలనా, క్రమశిక్షణ పరంగా ఇది DGP నియంత్రణలో పనిచేస్తుంది.
TG-TMARSలో ప్రధానంగా రెండు విభాగాలు ఉంటాయి.
- Traffic Wing
- Road and Rail Safety Wing
ట్రాఫిక్ నిర్వహణ, ఎలక్ట్రానిక్ ఎన్‌ఫోర్స్‌మెంట్, ట్రాఫిక్ కంట్రోల్ రూమ్‌లు, హైవే పెట్రోలింగ్, రోడ్డు ప్రమాదాల దర్యాప్తు, ఎన్‌ఫోర్స్‌మెంట్ డేటా విశ్లేషణ వంటి అంశాలను ఈ బ్యూరో పర్యవేక్షిస్తుంది.
ట్రాఫిక్ ఉల్లంఘనలపై నిఘా
ఈ బ్యూరో పరిధిలో ఈ-చలాన్ వ్యవస్థ కూడా ఉంటుంది.
డ్రంకెన్ డ్రైవింగ్, హెల్మెట్ లేకుండా వాహనం నడపడం, సీట్ బెల్ట్ ఉల్లంఘన, రాంగ్ రూట్ డ్రైవింగ్, లేన్ ఉల్లంఘనలు, ఓవర్‌స్పీడ్, ఓవర్‌లోడింగ్ వంటి నిబంధనల ఉల్లంఘనలను పర్యవేక్షించనుంది.
స్టేట్ ట్రాఫిక్ కంట్రోల్ రూమ్ ద్వారా వివిధ ప్రాంతాల్లోని కంట్రోల్ రూమ్‌లు, ఎలక్ట్రానిక్ ఎన్‌ఫోర్స్‌మెంట్ పరికరాలను అనుసంధానం చేసి రియల్‌టైమ్ మానిటరింగ్ చేపట్టనున్నారు.
ప్రమాదం జరిగితే వెంటనే స్పందన
TG-TMARSలో ముఖ్యమైన అంశాల్లో రోడ్డు ప్రమాదాలపై వేగంగా స్పందించడం ఒకటి.
ప్రతి పోలీస్ స్టేషన్‌లో Road Crash Response Officerను నియమించనున్నారు. ట్రాఫిక్, లా అండ్ ఆర్డర్ పోలీస్ స్టేషన్లలో ఈ బాధ్యత ఉంటుంది.
ప్రమాదం జరిగిన వెంటనే ఘటనాస్థలికి చేరుకోవడం, ప్రమాద స్థలాన్ని భద్రపరచడం, గాయపడినవారిని గోల్డెన్ అవర్‌లో ఆసుపత్రికి తరలించేందుకు సహకరించడం వంటి బాధ్యతలు ఉంటాయి.
అలాగే ప్రమాద వివరాలను వెంటనే eDAR ప్లాట్‌ఫామ్‌లో నమోదు చేయాలి.
హైవేలపై ప్రత్యేక పెట్రోలింగ్
నేషనల్ హైవేలు, ఎక్స్‌ప్రెస్‌వేలు, ఔటర్ రింగ్ రోడ్, గుర్తించిన రాష్ట్ర హైవేలపై ప్రత్యేక పెట్రోల్ యూనిట్లు ఏర్పాటు చేయనున్నారు.
50 కిలోమీటర్లకు పైగా నేషనల్ లేదా స్టేట్ హైవే పరిధిలో ఉన్న పోలీస్ స్టేషన్లకు ప్రత్యేక Highway Patrol Unit ఏర్పాటు చేస్తారు.
ఈ యూనిట్‌లో ఒక హెడ్ కానిస్టేబుల్, ఒక కానిస్టేబుల్, ప్రత్యేక పెట్రోల్ వాహనం ఉంటాయి.
వాహనాలకు డ్యాష్‌బోర్డ్ కెమెరాలు, ఆటోమేటిక్ నంబర్ ప్లేట్ రికగ్నిషన్ (ANPR), స్పీడ్ డిటెక్షన్ పరికరాలు అందుబాటులో ఉంటాయి.
TG TMARS ట్రాఫిక్ మేనేజ్‌మెంట్ ఫండ్
TG-TMARS కోసం ప్రత్యేక Traffic Management Fund కూడా ఏర్పాటు చేయనున్నారు.
మోటార్ వెహికల్స్ యాక్ట్, నిబంధనల కింద వసూలయ్యే పోలీస్ కాంపౌండింగ్ ఫీజులు, జరిమానాల్లో 40 శాతం ఈ ఫండ్‌కు జమ చేయనున్నారు.
ఈ నిధులను ఎలక్ట్రానిక్ ఎన్‌ఫోర్స్‌మెంట్ పరికరాలు, పెట్రోల్ వాహనాలు, ట్రాఫిక్ కంట్రోల్ రూమ్‌లు, టెక్నాలజీ, అత్యవసర రోడ్డు పనులు, శిక్షణ, రోడ్డు భద్రత చర్యలకు వినియోగించనున్నారు.
TG TMARS పోలీస్ విభాగంలో కొత్త పోస్టులు
ప్రతి పోలీస్ కమిషనరేట్‌లో Joint Commissioner of Police (Traffic) పోస్టును ఏర్పాటు చేయనున్నారు.
అలాగే ప్రతి జిల్లాలో Additional Superintendent of Police (Traffic) పోస్టు ఉంటుంది.
TG-TMARS కోసం ఇతర పోలీస్ విభాగాల నుంచి 300 పోస్టులను సిబ్బందితో సహా బదిలీ చేయాలని ప్రభుత్వం ఆదేశించింది. ఇప్పటికే ఉన్న ట్రాఫిక్ వింగ్స్, ట్రాఫిక్ పోలీస్ స్టేషన్లు, ఈ-చలాన్ కార్యకలాపాలు కూడా కొత్త బ్యూరో పర్యవేక్షణలోకి వస్తాయి.
రోడ్డు, రైలు భద్రత కూడా TG-TMARS పరిధిలోనే
ట్రాఫిక్‌తో పాటు రాష్ట్రంలోని మెట్రో రైలు, హైస్పీడ్ రైలు, ఇతర రైలు రవాణా భద్రతకు సంబంధించిన పోలీసింగ్ కూడా ఈ బ్యూరో పరిధిలో ఉంటుంది.
ఇక TG-TMARS డైరెక్టర్ స్టాండింగ్ ఆర్డర్లు, Standard Operating Procedures (SOPs) రూపొందించాలి. బ్యూరో అమలు పరిస్థితిపై ఆరు నెలల్లో రాష్ట్ర రోడ్డు భద్రతా మండలికి నివేదిక ఇవ్వాల్సి ఉంటుంది.
జూలైలోనే తెలంగాణ ప్రభుత్వం ట్రాఫిక్ నిర్వహణ, రోడ్డు భద్రత కోసం ప్రత్యేక బ్యూరో ఏర్పాటు చేసే దిశగా చర్యలు ప్రారంభించింది. ట్రాఫిక్‌ను కేవలం నిబంధనల అమలుగా కాకుండా సమగ్రంగా నిర్వహించాలని సీఎం రేవంత్ రెడ్డి అధికారులను ఆదేశించారు.
Read More: Read Today’s E-paper News in Telugu
